Venezuela ke stòp ku violensia, armanan ta ser destruí públikamente.


Polis venezolano a destrui kasi 2000 arma riba un plasa na Caracas. A usa zag i mashin di sleip pa desarmá e skopèt i pistolnan. Segun e minister di asuntunan intèrno di Venezuela, Reverol, e akshon ta parti di un kampaña pa desarmá venezolanonan i trese pas. Pa algun tempu kaba siudadanonan por a entregá arma a kambio di aparato elektróniko òf material di konstrukshon. Venezuela ta den gara di un ola di violensia grandi. E último añanan esaki a krese pa motibu di e krisis ekonómiko pisá di e pais. Awendia Venezuela ta un di e paisnan mas peligroso den Latino Amérika. Bandanan ta haña mas i mas material pisá den nan poder, hopi biaha pa via di polisnan korupto. Regularmente ta hòrta arma di outoridatnan tambe. Segun Reverol, entretantu gobièrnu a desaroyá un teknologia nobo di laser, ku por lokalisá armanan hòrtá.