Pa promé biaha den su historia e onsena di Brazil ta gana medaya di oro. Dilanti un stadion Maracana yen yen, e ekipo di Brazil ta gana di Alemania den un final ku a keda disidí ku tiru di pinalti. Na di 120 minüt e wega tabata ainda 1-1 Nils Petersen di Alemania a faya den su turno, pa despues Neymar hinka e di sinku gol ku a bira e gol desisivo pa Brazil konkistá e medaya di oro den weganan olímpiko. Durante e tempu reglamentario ta e propio Neymar tabata esun ku marka e úniko gol pa Brazil. Durante e prome mitar di e wega, Neymar a hinka un bunita gol. Despues di sosiegu Maximilian Meyer a hinka e gol pa Alemania empatá. Brazil ku a bira kampion di mundu na sinku okashon, kampion di Copa America na ocho okashon, tabata falta e medaya di oro. Ku e logro den weganan olímpiko, awor e ekipo di fútbòl di Brazil tin tur e titulonan grandi riba su nòmber.