Despues ku e agrupashon musikal GIO a stòp di eksistí a surgi hopi pregunta kiko e musiko i kantantenan ta bai hasi. Te na e momentunan akí ainda, Dibo Doran no ta muchu sigur di kiko e lo bai hasi den futuro, na momentu dezèmber awor GIO stòp di toka definitivamente. Entretantu Leandry “Lèlè” Gonzalez ku ta otro dje kantantenan prinsipal di GIO ta pasa awor pa orkesta Vega. Sinembargo Vega su vishon ta pa ta un banda ku ta toka varia. Nan a bini ta demostra esaki tambe e lastu tempu ku un front nobo ku ta konsisti di tres hoben bastante yòng i nobo den farandula lokal. Orkesta Vega tin tur ritmo den nan repertorio, esta for di salsa, merengue, kizomba, bachata pero tambe e popular ritmo kombina. Esaki ta loke por a skucha di e banda na e sitionan kaminda nan ta presentá, manera entre otro na The View i De Heeren. E pregunta ta surgi si lo kambia estilo di e banda awor ku “Lèlè” tambe a “join”. Segun lider di Vega, Sherel Semeleer, e vishon di e banda lo keda meskos tambe na momentu ku Lèlè djòin. Farandula lo bai konose un otro Leandry Gonzalez for di e “Lèlè” ku tabata den GIO Fuertísimo. Algu ku sigur no ta den diskushon ta e talento e kantante en kuestion. Sherel ta sigur e lo por bai hasi un bon papel den farandula di Kòrsou huntu ku orkesta Vega. Entretantu ya por baila i skucha Leandry Gonzalez huntu ku orkesta Vega den nan presentashonan regular.
