Gobièrnu kolombiano no ta kumpli ku promesanan hasí na su atletanan.


Na 2012, e presidente kolombiano a komprometé su mes pa traha un stadion na Apartadá, e lugá di oríhen di e atleta kolombiano Caterine Ibargüen. Aktualmente a para e konstrukshon. E periodista Jorge Sánchez, di Las 2 Orillas, a denunsiá e falta di kompromiso di e presidente di Colombia, Juan Manuel Santos, pa ku e atletanan olímpiko. Den un artíkulo Sánchez a skibi ku e presidente anterior di Coldeportes, Andrés Botero, a bishitá \, e aktual kampion ku medaya di oro den salto tripel na Weganan Olímpiko i a primintié un stadion ku lo tin su nòmber. “E tereno di 4.5 hèktar, kaminda lo a pone e promé pieda di e stadion Caterine Ibargüen, tabata kla kaba. Einan tur esnan ku ta prosedente di e lugá i e mihónan di pais, por a ensayá tur tipo di disiplinanan, manera atletismo, fòlibòl, basketbòl, sòftbòl i futbòl”, asina e artíkulo ta bisa. Segun Sánchez, a saka un presupuesto di seis mil mion peso pa e proyekto. Na desèmber 2015 a kuminsá traha, pero ocho luna despues a para ku e konstrukshon. Un estudio di e tera tabata mal hasí i awor ta papia ku kosto di e trabounan lo subi na nuebe mil mion peso. Ibargüen, ku despues di su partisipashon na Weganan Olímpiko tin un medaya di plata (Londres 2012) i awor un di oro (siman pasá na Rio), no tin un lugá pa e ensayá manera e mihó di mundu. Otro promesa ku Santos mester kumpli kuné ta un kas pa e bòksdó Yuberjen Martínez, ku a kaba di gana un medaya di plata na Rio. “Santos ta spesialisá pa keda malu ku tur hende, prinsipalmente ku nos deportistanan. Kuater aña pasá, el a primintí Oscar Figueroa, ku a haña medaya di oro den hisamentu di peso, un koliseo pa por praktiká hisamentu di peso, pero esei tambe a keda solamente na palabra. Ta hopi tristu ku nos dirigentenan nashonal no ta balorá nos deportistanan”, segun artikulo di e periodista colombiano.