Un yu hòmber di e baròn di droga mexicano Joaquin ‘El Chapo’ Guzman ta entre e hòmbernan ku a keda sekuestrá e siman aki, den un restorant na Puerto Vallarta. Un grupo di hòmber armá a drenta e restorant ku ta keda den e zona turístiko i nan a bai ku seis miembro di un banda. A tarda promé ku polis a konfirmá ku ta trata di e yu hòmber, di 29 aña, di e baròn di droga. Nan a bai tambe ku un primu di ‘El Chapo’. Segun outoridat mexicano e hòmbernan ku a keda sekuestrá ta miembro di e kartel di droga Sinaloa dirigí pa Guzman, ku nan a arestá na yanüari último. Den e área rondó di Puerto Vallarta tin un lucha pa poder entre e kartel di Sinaloa i e banda di Jalisco Nueva Generación. Tin sospecho ku kasi sigur ta nan ta tras di e sekuestro.