
Den e kuater añanan benidero mas di trinta kompania oropeo ta bai desaroyá huntu instrumèntnan pa detektá mas lihé ainda kriminalnan digital. E komishon oropeo a destiná 12 mion euro pa esei. E métodonan ku ta bai desaroyá mester detektá mas lihé posibel informashonnan konfidensial for di un kantidat enorme di data. Ta trata di por ehèmpel haña i konektá karakterístikanan biométriko (esaki ta karakterístika di kada persona kaminda por kontrolá su identidat). Si un sospechoso aparesé riba un gran kantidat di potrèt, e mester keda rekonosé dor di su karakterístikanan: p.e. kara, trahe, postura. Di Hulanda ta partisipá entre otro NFI (Instituto Forénsiko Ulandes), TNO i Universidat di Amsterdam. NFI kier bai traha riba un otro instrumènt ku yama ‘weak signal detection’. Ta trata di parti di informashonnan ku riba nan mes por mustra insignifikante, pero ku por ta esensial den lokalisashon di sospechosonan. Por ehèmpel un kódigo ku kriminalnan ta usa pa stroba aktividatnan.