Den un komunikado, presidente di Konseho Supremo Elektoral, Drs. Raymond "Pacheco" Römer, a duna vários informashon importante relashoná ku e proseso pa sosténe listanan polítiko. KOMUNIKADO OFISIAL : Sostenementu di lista pa agrupashonnan polítiko.
Djasabra 20 i djadumingu 21 di ougùstùs 2016, entre 8or di mainta pa 8or di anochi tur persona ku tin derechi di vota, por sostené un di e 15 agrupashonnan polítiko ku tin mestere di sosten pa por partisipá na elekshon di 30 di sèptèmber 2016.
Artíkulo 16 insiso 1 di e Ordenansa di Elekshon (A.B. 2010 no. 87) ta stipulá ku pa por partisipá na elekshon, kada lista di kandidato, ku eksepshon di lista di e agrupashonnan ku ta representá den Staten, mester keda sostené pa un kantidat di votadó igual na 1% di e votonan bálido ku a keda emití den e último elekshon di Staten.
Den e último elekshon di Staten tabatin 86.971 voto bálido. Esaki ta enserá ku agrupashonnan polítiko ku no tin representashon den Parlamento, mester haña sosten di por lo ménos 870 votadó pa por partisipá na elekshon di 30 di sèptèmber 2016.
Pa e sostenementu di lista Konseho Supremo Elektoral ta pone lo siguiente na konosementu:
• 15 partido lo partisipá na sostenementu di lista.
• Riba e “ondersteuningsbiljet” tin nòmber di e listanan i nòmber di e promé kandidato di e listanan. E listanan ta numerá di 1 te ku 15.
• Votadó mester bai ku sédula, reibeweis òf pasport bálido pa identifiká su mes.
• Asina e votadó drenta urna, tur kos ta kasi meskos ku riba dia di elekshon mes.
• Tuma e “ondersteuningsbiljet” i pasa pa un di e hòkinan pa sostené un lista.
• Usa e pòtlot kòrá pa yena e rònchi parti robes di e nòmber di e lista ku bo ke sostené. Bo por sostené UN (1) lista so.
• Skirbi òf pinta riba e “ondersteuningsbiljet” òf pone kualke mensahe riba dje, ta hasié outomátikamente inbálido.
• Si bo yena algu robes òf hasi un fout, duna e presidente di urna e “ondersteuningsbiljet” será bèk i pidi un nobo pa bo sostené un lista di nobo. Esaki por sosodé solamente UN (1) biaha.
• Dobla e “ondersteuningsbiljet” i deposit’é den e buzòn.
Por sostené lista na:
Kranshi na Otrabanda Sentro di Bario Brievengat Sentro di Bario Montaña Sentro di Bario Sta. Maria Sentro di Bario Tera Cora
Detenidonan por sostené lista na Sentro di Detenshon Bon Futuro mes.
Atentamente, Presidente Konseho Supremo Elektoral Drs. Raymond (Pacheco) Römer| (Klek riba imágen akí bou pa foto grandi di ehèmpel di "ondersteuningsbiljet 2016)
