Calvin Klein i Paul Smith ta sostené Apple den lucha kontra Samsung.


Un grupo di diseñadónan mundialmente famá ta sostené Apple den un lucha hurídiko largu pa patènt ku e empresa di teknologia merikano ta hibando kontra su kompetidor Samsung. Den un karta, Calvin Klein, Paul Smith, Norman Foster i shen otro diseñado ta para tras di Apple. Tambe diseñadónan grandi di kasnan di moda manera Louis Vuitton i Dries van Noten huntu ku e fábrika di outo Bentley Motors tambe ta entre e firmantenan. E lucha hurídiko ta hala kakiña pa 5 aña kaba i ta trata violashon di tres patènt riba e diseño di iPhone. Den nan tin tambe patènt riba e konosido forma rektangular pretu ku e hukinan rondó i e íkononan di aplikashon (app) di 16 kolor riba e pantaya. Na 2012 un hurado na California a determiná ku Samsung mester a paga 1 bion dòler na daño perhuisio. ( $1.000.000.000) E Koreanonan a apelá un par di bia, despues di kual e but a baha bira 548 mion dòler. ($ 548.000.000) Entretantu e lucha a yega te na Korte Internashonal di Hustisia. Esaki a indiká aña akí, ku nan ke bai tuma e argumentonan di Samsung na konsiderashon. Samsung ta pretendé ku e daño di pèrhuisio pa violashon di un diseño patentá, mester ta basá riba e balor di e diseño pa e produkto total i no riba e ganashi total ku e produkto ta generá. E ponensia aki ta hinká den e Lei di Patènt di 1952.

“Den kaso ku Samsung haña rason serka Korte Internashonal di Hustisia, esaki lo forma un menasa pa eksistensha di diseñadónan profeshonal”, sigun inisiadó di e karta ku e diseñadónan i konsehero di diseño Charles Mauro a manda pa Financial Times. “E merkado merikano e orei por haña un avalancha di produktonan imitá”, asina Mauro ta bisa.

Samsung sinembargo ta alegá, sostené pa empresanan di teknologia grandi manera Google i Facebook, ku Apple ta habri porta pa “ròlnan di patènt”, ku ta malusá e sistema di propiedat intelektual. No ta muchu kla ki dia tin un desishon di Korte Internashonal di Hustisia, debí ku Ministerio di Hustisia merikano ta haña ku e kaso mester keda tratá dor di un hues menor.