Dos atleta merikano di e ekipo di natashon olímpiko no por a subi avion pa bai Merka ora nan a purba sali for di Rio di Janeiro. E duo akí lo a hasi deklarashonnan kontradiktorio en konekshon ku un atrako na e siudat di Brazil. Entretantu, outoridatnan brasileño a pone e atletanan Jack Conger i Gunnar Bentz den libertat bou di kondishon ku nan lo koperá ku e investigashon. Un di tres atletanan, James Feigen, tambe a bai di akuerdo pa duna un deklarashon. E di 4 atleta, Ryan Lochte, si lo a logra biaha pa Merka. Un total di 4 atleta merikano lo a ser atraká den un taksi den e mardugá di djasabra pa djadumingu último bou di menasa di un arma di kandela. E atrakadónan supuestamente tabatin aparensia di agentenan polisial i e atletanan mester a entregá tur nan pertenensianan. Sin embargo ainda tin poko prueba ku ta sostené e vershon di e atletanan. Tambe nan tabatin diferente vershon di loke a pasa. Kada un a menshoná un kantidat diferente di sospecho ku lo a atraká nan. Polis ta buskando e shofùr di e taksi.