Segun minister di Maneho di Gobernashon, Planifikashon i Servisio Públiko, Etienne van der Horst ningun kaminda tin indiká ku e no por aparesé riba lista di un partido pa elekshonnan benidero. Di e forma aki e minister ta reakshoná riba kritiká ku e la haña di entre otro lider polítiko di FOL Anthony Godett, ku a reklamá e echo ku e ta aparesé riba lista komo kandidato pa elekshon dia 30 di sèptèmber próksimo. Goddett a bisa ku Van der Horst mester retirá komo minister, pasó sigun lei e minister tin organisashon di elekshon bou di su enkargo. E echo ku komo minister di Maneho di Gobernashon, Planifikashon i Servisio Públiko, e ta mandatá tur loke tin di aber ku organisashon di elekshon na Konseho Supremo Elektoral no ta korekto. Esaki por kondusí na manipulashon polítiko i infiltrashon, segun Godett. Minister Van der Horst na su turno ta informá ku no tin nada pará den e ‘Kiesregelement’ òf den Areglo di Estado di Pais Kòrsou tokante partisipashon di Minister di Maneho di Gobernashon, Planifikashon i Servisio Públiko na elekshon pa parlamento. Artíkulo 43 di Areglo di Estado ta indiká ku personanan ku no por partisipá na elekshon, ta esnan ku pa medio di un veredikto irevokabel di wes ta sentensiá na un kastigu di prison di por lo ménos 1 aña i alabes a kita nan derecho di voto. Esaki no ta e kaso pa su persona, segun Van der Horst. Tambe Van der Horst a indiká ku no ta promé bia ku un minister di Maneho di Gobernashon, Planifikashon i Servisio Públiko ta riba lista di un partido. Durante e último elekshonnan, e minister di e tempu ei, Carlos Trinidad, tambe a paresé komo number 8 riba lista di Pueblo Soberano.