Korte a terminá un konflikto entre e tres yunan di Martin Luther King Jr., tokante benta di e beibel i e medaya di pas ku nan tata a gana ku e premio Nobèl. Den 2014, dos yu hòmber di King a bai di akuerdo pa bende e dos ophetonan di nan tata, pero e yu muhé Bernice no kier a bende esakinan na un kumpradó anónimo, pasó pa e, ta trata di ophetonan “sagrado”. E tin e beibel i e medaya den su poder. P’esei e rumannan hòmber a entamá un kaso i a supliká wes pa nan ruman muhé entregá nan e ophetonan. E wes a duna nan rason i a disidí ku Luther King III ta haña e ophetonan, segun Reuters. E detayenan eksakto di e veredikto no ta konosí ainda, p’esei e ophetonan mester keda wardá turesten den e kaha fuerte di korte. Riba petishon di ámbos partido, Luther King III lo keda ku e yabi. Dexter King ta presidente di e korporashon ku ta atministrá e herensia di Martin Luther King Jr. Martin Luther King III ta presidente di e konseho di direktiva. Bernice King ta akshonista i miembro di direktiva. Martin Luther King Jr. a keda asesiná na 1968 dor di James Earl Ray. E no a laga tèstamènt atras.