Área di desaster na Louisiana.


Por lo ménos 5 hende a hoga debí na e inundashonnan na e estado merikano Louisiana. Mester a reskatá sigur 20.000 persona den áreanan inundá. Tin inundashonnan fuerte na e parti sùit di Louisiana. Sigun gobernador John Bel Edwards mester a reskatá personanan den outo, kasnan i hospital. E inundashonnan ta resultado di áwaseru fuerte. E áwaseru a pasa bai i maske solo a sali, ainda e nivel di awa por subi. Presidente Barack Obama a deklará e área komo zona di desaster. Na mart di aña aki tambe tabatin inundashon na Lousiana. Esaki a resultá den 4 persona ku a hoga i míles di kas ku a sufri daño.