Fransia ke atendé mensahenan kodifiká riba nivel internashonal.


Fransia ke pa atendé mensahenan di “app” ku ta kodifiká riba nivel internashonal. E Minister pa Asuntunan Doméstiko di Fransia, Bernard Cazeneuve mes ke hinka un plan den otro pa atendé esaki huntu ku su kolega di Alemania. Kada bes mas e popular servisionan di mensahe manera Whatsapp i Telegram ta hinka un kodifikashon (code) fiho, pa asina “hacker-nan” i servisio di inteligensia no por desifrá esakinan. E servisionan di inteligensia ta den lucha kontra e desaroyo ei, pasobra asina ta bira masha difísil, pa por interseptá mensahe di posibel terorista òf ekstrimistanan. “Hopi mensahe tokante di ehekushon di atakenan terorista ta keda mandá den “code”. Ta un kuestion importante i sentral den e lucha kontra terorismo," asina Cazeneuve a deklará. “Fransia lo bini ku proposishon. Mi a manda algun pa mi kolega aleman,” e titular franses a bisa. Mas lat den e luna akí, Cazenueve lo deliberá ku e minister di Asuntunan Doméstiko alemán. E Minister aleman De Maiziere a bisa ku Alemania ta den e “vizier” di terorismo. P’esei e ke pa ehérsito aleman bai traha mas estrecho ku polis, den preparashon pa posibel atakenan di gran eskala.