Nadal i Lopez ta gana oro olímpiko den tènis dòbel.


Rafael Nadal i Marc López a gana oro na Rio de Janeiro. Nan a bira kampion den dòbel tènis. E dos tenistanan spañó, a vense e duo ulandes Robin Haase/Jean-Julien Rojer den promé buelta, pa despues den final derotá e romanonan Florin Mergea i Horia Tecau. Nan ta’tin mester di 3 sèt, ku a dura masomenos dos ora i mei. E resultado final a bira 6-2, 3-6 i 6-4. Esaki ta bira e di dos medaya di oro pa Nadal. Na 2008 el a logra medaya di oro den e kategoria di “single”. Medaya di bròns a bai pa e merikanonan Steve Johnson i Jack Sock, ku a logra superá e kanadesnan Daniel Nestor i Vasek Pospisil ku skor di 6-2 i 6-4. Pa loke ta e kategoria di tènis individual, ainda Nadal tin chèns di medaya. Rafael Nadal, di 30 aña a gana di e brazileño Thomaz Bellucci. Nadal, ku ta 14 bia’ ganadó di Grandslam, su siguiente rival ta Juan Martin del Potro.