NOC*NSF no tin nodi kambia e desishon di a saka van Gelder for di Weganan Olímpiko. Korte na Gelderland a rechasá tur eksigensia di e gimnasta. “Tur kos a kaba pa Yuri van Gelder” asina e reportero Marc Hamer a bisa na Radio 1. Hues no a amplia riba e diktámen. E detayenan ta bini otro siman. NOC*NSF a reakshoná mesora despues di e veredikto. “E desishon aki ta nifiká ku Weganan Olímpiko a kaba pa e atleta. Ta un lástima ku e kaso mester a yega korte.”
No tin apelashon. Van Gelder Van Gelder lo no apelá. Asina su abogado a duna di konosé. Ya ku el a pèrdè e kaso, e gimnasta mester paga gastunan di e proseso, balorá na 1435 euro. Djaluna ku a pasa, a manda Van Gelder kas. E no tabatin mag di keda Rio mas, despues ku el a sali anochi for di e kampamentu ulandes i bai fiesta. Abogado Hellingman a deklara ku no tabatin base pa manda e gimnasta kas. Segun Hellingman, den e akuerdo ku e atleta a firma, no tabatin inkluí niun obligashon ni nada konkreto tokante bon komportashon. E abogado di NOC*NSF a bisa ku e kabesantenan tin e derechi pa ekskluí deportistanan i ku e medida ta proporshonal. Segun e abogado, NOC*NSF no por a hasi nada otro ku manda Van Gelder kas, na momentu ku su “coach” Van Bokhoven i e federashon di gimnasia a eksigí esaki.