Indígenanan ta denunsiá eksklushon dor di Guatemala.


Pa medio di un dokumentu e representantenan indígena ta eksigí i proponé pa lanta un estado multiétniko i multinashonal inkluyendo e komunidatnan indígena. Representantenan di outoridatnan indígena di Guatemala i di Koordinashon i Konvergensia Nashonal Maya Waqib Kej a presentá un dokumentu kaminda nan ta denunsiá e eksklushon ku nan ta pasa aden dor di Estado. E nòmber di e rapòrt ku a presentá den kuadro di Dia Internashonal di Pueblonan Indígena ta: “Demanda i proposishonnan polítiko di e pueblonan indígena di Iximulew”. Den e karta nan ta proponé un proyekto polítiko ku ta kontribui na formashon di un estado multinashonal. E dokumentu ta konsistí di shete punto, entre nan un riba e protekshon di e teritorionan i un otro riba e partisipashon polítiko, asina Domingo Hernández, miembro di e Konvergensia Nashonal Maya a splika. Otro tópiko di e rapòrt ta rekonosimentu di e pueblonan indígena dor di hustisia guatemalteko, manera rèspèt di derechonan di e poblashon indígena. “Nos ta un poblashon, nos tin dignidat, nos por traha i nos por partisipá den e proseso di fundashon di e Estado Multinashonal ku nos tin mester den e pais”, Hernández a indiká. Tambe el a afirmá ku e grupo indígena no ta pretendé di haña produktonan regalá, pasobra esaki ta krea “dependensia entre komunidatnan”.

42 porshento di e poblashon di Guatemala ta pertenesé na un òf otro pueblo indígena. Despues di Bolivia ku 62 porshento, Guatemala ta un di e paisnan ku mayor kantidat di indígena.

Na parti nort i na parti ost di siudat di Guatemala tin e kantidat mas grandi di indígena, spesialmente na Quiché, Alta y Baja Verapaz, Sololá, Totonicapán i San Marcos.

Durante e periodo kolonial a hòrta tera di e indígenanan, tambe dor di kresementu di e metrópolis e komunidatnan a haña nan forsá pa bai na regionannan mas haltu. Dor di e situashon akí e indígenanan a haña nan obligá na traha komo obrero den temporada di kosecha.

Ku e akuerdonan di pas tabatin un reforma konstitushonal ku a inklui e derechonan di e poblashon indígena i e rekonosimentu multiétniko i multinashonal di e pais.Sin embargo no tabata posibel pa ehersé e derechonan akí.