
11 aña despues di su último álbum “Welcome to Jamrock”, Damian Marley, e yu hòmber mas yòng di e legendario Bob Marley, a anunsiá ku e lo lansa su di 4 álbum na òktober di e aña aki. Ku “Welcome to Jamrock”, Marley a gana entre otro Mihó Álbum Reggae durante e premionan Grammy na 2006. No opstante ku ta despues di hopi aña Marley ta lansa un álbum di studio, e tabata bastante aktivo durante añanan. Huntu ku artistanan manera Mick Jagger i Joss Stone e la graba piesanan pa e grupo “SuperHeavy” di kua el a forma parti di dje. Titulo di e álbum nobo ta Stony Hill kual a ser produsí pa gran parti pa Marley mes. E promé “single” di su album nobo ku a lansa ta “Nail Pon Cross”, ku a debutá siman pasá riba Billboard. “Nail Pon Cross” ta patuá hamaikino pa “nailed on the cross”, ku ta nifiká klabá na e krus.