E atleta Yuri van Gelder ta entamá kaso kontra NOC*NSF pa obligá su partisipashon na e final di Weganan Olímpiko. Korte di Arnhem a konfirmá esaki. E kaso lo ta djabièrnè awor 11.15 ‘or di mainta. NOC*NSF a manda Yuri van Gelder kas djaluna pasá, pasó despues di su kualifikashon pa e final, el a sali i bin bèk te 6’or di mainta fuma fuma i ta hasi masha bochincha den e kampamentu olímpiko ulandes. Den un rekonstrukshon AD a skibi ku Van Gelder, a konsekuensia di e salimentu e anochi promé, a lanta te 3‘or di mèrdia i no a asistí na su training. No ta promé biaha ku el a sali for di e kampamentu olímpiko sin pèrmit. Segun e korant na un okashonnan anterior tambe el a yega di sali i keda afó te mei anochi, loke ta kontra tur regla. E federashon di gimnasia hulandes a avisá e federashon internashonal FIG ayera ku Van Gelder lo no partisipá na e final di e disiplina. E franses Danny Rodriguez lo tuma su lugá. E federashon a informá ku lo no por drai nada bèk.E pregunta ta: kiko e kaso di djabièrnè awor por kambia na e desishon di FIG? Komo organisadó di e weganan, ainda Komité Olímpiko Internashonal por intervení den e kaso. Si e haña rason di wes, Van Gelder por akudí ainda tambe na CAS, ku ta e máksimo tribunal deportivo. E abogado di Van Gelder, Hellingman a bisa ku e ta mira ku tin hopi chèns pa forsa un lugá den final. E reglamentu pa esnan ku ta partisipá na e weganan lo no ta asina kla. Tambe ku lo no ta prohibí pa bebe alkohòl durante di e weganan. Korte a informá ku e abogado tabata kier pa e kaso bin dilanti for di djaweps. Riba petishon di NOC*NSF e kaso lo ta bai dilanti djabièrnè awor. E atleta ulandes lo mester partisipá na e final ku ta djaluna awor na Rio de Janeiro.
