Gobernadó di Florida ke mas yudansa pa kombatí Zika.


E gobernador republikano di Florida Rick Scott (foto) ta haña ku e gobièrnu federal merikano no ta hasi sufisiente pa ku e lucha kontra e vírus di Zika. Segun e, presidente Obama i Kongreso mester traha huntu pa atendé ku e problema internashonal. Den un kòmbersashon ku NBC, Scott a bisa ku e servisio di salubridat di Florida entretantu a konstatá diesseis kaso di Zika.

Poko tempu pasá na Miami, a konstatá e promé kuater kasonan di Zika na Estados Unidos. Miéntras tantu na Florida ta usa insektisida pa kombatí e sanguranan. E vírus por kousa daño serio na beibinan ku no a nase ainda. Resientemente Obama a pidi Kongreso pa pone plaka èkstra disponibel pa kombatí e vírus di Zika na Estados Unidos i den eksterior. E fondonan aktual ku ta disponibel pa esei ta kaba hopi lihé. Gobernador Scott a bisa ku el a pidi CDC, ku ta e servisio pa salubridat públiko, pa pone 10.000 pakete èkstra, pa evitá mas ekspanshon di e vírus. E paketenan ta konsistí di moskitero, kondon i repelente kontra sangura. Ainda e no a haña kontesta di CDC. Marco Rubio, e kandidato presidensial republikano a haña hopi krítika den pasado, paso segun e muhénan na estado ku ta kontaminá ku e vírus di Zika no mag di kometé aborto, ni ora tin indikashon ku e yu por nase ku deshabilidat serio. “Mi ta komprondé ku hopi hende no ta di akuerdo kumi, pero mi ta kere ku tur bida ta bal la pena pa keda konservá”, asina Rubio a bisa.