A ataká bùs ku diesdos periodista na Rio de Janeiro.


Djamars anochi na Rio a ataká un di e sentenáres di bùsnan ku diariamente ta transportá periodistanan durante Weganan Olímpiko. Tabatin diesdos periodista den e bùs ku a sali di Deodoro, na e parti nort, pa e sentro di media den e bario olímpiko Barra. E atakantenan a tira piedra pa kibra glasnan dje bùs. Otro testigunan ta bisá ku a lòs tiru tambe riba e bùs. Ora e bùs a pasa den e bario Curicica di ripiente algun di e bentananan na banda a kibra. Tur e pasaheronan a bai drumi abou. Dos periodista a keda heridá dor di glasnan kibrá, pero daño físiko a keda limitá. Bou di guia di polis e bùs a sigui pa e sentro di media. Aparte di e atake riba e bus, den fin di siman ku a pasa, un bala di arma di kandela a pasa dor di e dak di e tènt di prensa na e kompleho deportivo hípiko na Deodoro. Niun hende a sali heridá. Ainda no ta kla ta ken a lòs tiru.