Rignald Lak, lider di Movementu Patriótiko Kòrsou (fundá 2 yüli 2005) i Hugh Lopes lider di Movementu Kiratay (fundá 2014) lo no partisipá na próksimo elekshon benidero. Nan a tuma e desishon despues di a reflehá entre otro riba palabranan di Mgr. Luis Secco : “Gobernantenan no por keda trese divishon den nos pueblo “.
Movementu Kiratay Patriótiko Kòrsou a uni riba dos aspekto fundamental na interes di pueblo di Kòrsou ; na promé lugá amor, stima bo próhimo meskos ku bo ta stima bo mes i na di dos lugá un plan mayó nashonal pa desaroyo di Kórsou integral i struktural di tur e 9 ministerionan ankrá den lei pa mas aña. Na opinion di Rignald Lak i Hugh Lopes di Movementu Kiratay Patriótiko Kòrsou, pais por keda bon goberná na interes di pueblo, solamente si lider di partidonan den gobernashon apliká di bèrdat i hustu e dos aspektonan aki. Si di bèrdat bo stima bo próhimo bo ta dun’é un man yud’é den su sobrebibensha aki na tera .
Plan mayó nashonal pa desaroyo di Kòrsou su 9 ministerionan intergral i struktural, ankrá den lei pa mas aña, ta e alternativa pa solushoná pueblo di Kòrsou su problemannan ku polítikonan pa hopi aña kaba ku ta primití i no ta kumpli. Ademas Movementu Kiratay Patriótiko Korsou, ta konsiderá ku e faktor di tiki tempu a hunga un ról hopi grandi den nan kampaña di informashon na pueblo versus e kantidat di informashonnan di diferente partidonan polítiko ku ta invadiendo mente di e suidadano. E movementunan a opta pa “no” partisipá na elekshonnan benidero, paso nan ta kere firmemente den union pa huntu konstruí un mihó nashon pa nos poblashon. Te asina leu e komunikado firmá pa ambos lider.