Proyekto “Biba bon i yega 100” di MCB pa penshonadonan tabata un éksito.


Maduro & Curiel’s Bank a klousurá e proyekto “Biba bon i yega 100”, organisá spesial pa penshonadonan den kuadro di selebrashon di MCB su 100 aniversario. E siman tabata yená ku diferente tayér ku tópikonan hopi interesante i aktual. Meta di “Biba bon i yega 100” ta pa duna e penshonadonan un atenshon spesial, pero tambe pa amplia nan konosementu riba diferente área ku nan por apliká den nan bida diario awor ku nan ta disfrutá di nan penshun. Un total di 1250 penshonado a partisipá grátis na e diferente tayérnan ku a tuma lugá na Biblioteka Nashonal Kòrsou. Tur penshonado ku a inskribí por a skohe entre e siguiente tayérnan: Facebook & Skype, medisina natural, ehersisio, defensa propio, dekorashon di bolo, seguridat na kas, obra di man, presupuesto & biba bèrdè, kuido di kurpa & nutrishon, baile, lei & derechi. Tur tayér tabata den man di profeshonalnan ku hopi pasenshi i eksperensia. MCB tambe a sòru pa tur penshonado partisipante disfrutá di un pasa boka, refresko i den pousa un tremendo ambiente musikal.