Pelé no por sende e kandela olímpiko djabièrnè anochi den stadion di Maracanã na Rio. E leyenda di futbòl di 75 aña a bisa den un deklarashon ofisial: “N’e momentunan akí mi no ta sufisientemente fuerte pa partisipá na e seremonia di apertura. Mi mester karga e responsabilidat pa e desishon akí. Semper mi a purba di no desepshoná mi famia i e pueblo brasileño.”
Último dianan Pelé tabatin hopi problema ku su hep, ku el a operá na desèmber. E brasileño ta ser mirá komo un di e futbolistanan di mas grandi di tur tempu. Tres biaha el a gana e título mundial (1958, 1962 i 1970). Na aña 1969 el a selebrá su di mil gol den e stadion di Maracanã.