Durante e siman aki den e siudat olímpiko, a tene un enkuentro pa konmemorá víktimanan di e sekuestro ku a tuma lugá durante e weganan di 1972. Teroristanan palestino, e aña ei a mata 12 deportista i entrenadó israelí. E biudanan di e “coach” di esgrima André Spitzer i di e pesista Joseph Romano a presensiá e konmemorashon na Rio de Janeiro. Presidente di Komité Olímpiko Internashonal, Thomas Bach a guía esaki. “Pa nos esaki ta un klousura inkreibelmente importante. Nos a warda 44 aña riba e konmemorashon i demostrashon di balor akí pa nos sernan stimá, ku a mata di manera asina kruel na München”, asina Ankie Spitzer a bisa rib e “Plenchi di Luto”.
