Un muhé kostarisense ta den kontienda pa e posishon di sekretario general na Nashonnan Uní.

Na e momentunan akí tin 11 kandidato pa sigui e koreano Ban Ki-moon, e sekretario general aktual di Nashonnan Uní, ku ta keda te promé di Yanüari 2017 na e posishon ei. Un di e kandaidatonan ta Christiana Figueres ku a keda nominá pa gobièrnu di Costa Rica.

Den su 70 aña di eksistensha, nunka promé Nashonnan Uní no tabatin un hende muhé komo sekretario general. Tin hende ta pensa ku ta tempu pa un hende muhé bini na e posishon ei.

Figueres, no ta e úniko hende muhé nominá pa e posishon di sekretario general di Nashonnan Uní. For di Argentina tin tambe Susana Malcora. Además e polítiko femenino di Kroasia Vesna Pusic, meskos e direktor-general di UNESCO Irina Bokova di Bulgaria, e èks kansiyer di Moldovia Natalia Gherman i finalmente e èks promé minister di New Zealand i aktual atministradó di Programa di Desaroyo pa Nashonnan Uní, Helen Clark.

Tur e hende muhénan aki ta kandidato pa bira sekretario general di Nashonnan Uní.

Figueres, un ekonomista i analista, ta yu muhé di José Figueres Ferrer, ku a sirbi tres bia komo presidente di Costa Rica. Dia di su nominashon, Figueres a bisa den un charla ku e tin e gran tarea pa duna mundu speransa bèk. Ela indiká ku su prioridat ta pa alkansá resolushonnan pasífiko i fortifiká e responsabilidatnan di e organisashon durante krísis, tur esaki ku un optisimismo pasífiko.

“Sin optimismo, sin un konvikshon fuerte ku nos komo sernan humano ta kapas di resolvé problemanan, nos lo no ta kapas di move bai dilanti”, asina Figueres a bisa.

E susesor di Ban Ki-moon lo por ta konosí for di luna di novèmber próksimo.