Minister Suzy Camelia-Römer di Tráfiko, Transporte i Planifikashon Urbano a disidí ku pa e próksimo tres lunanan, Oscar Derby ta bai konsentrá spesifikamente riba un análisis di e pasonan ku falta pa Kòrsou sali for di kategoria 2 pa yega na kategoria 1 (Cat1) den e kualifikashonnan di International Civil Aviation Organisation (ICAO). Esaki ta e organisashon spesialisá na Estados Unidos, ku ta traha indikashonnan i standardisashonnan pa aviashon internashonal. Oscar Derby tabata Direktor General di Curaçao Civil Aviation Authority, CCAA, for di aña 2013 te ku fin di yüli ku a pasa. Riba petishon di Minister Camelia-Römer, e ofisina profeshonal Deloitte, ta traha algun luna kaba riba un evaluashon di Derby i su funshonamentu den CCAA. E evaluashon ta kasi kla i segun indikashon preliminar, ta un bon momentu pa delineá eksaktamente kiko ta e elementonan krítiko di ICAO ku tin di finalisá. Un eskogo presentá pa Deloitte ta pa Derby sigui solamente komo konsehero pa algun luna, pa deskribí e puntonan aki. Minister Camelia-Römer ta di akuerdo ku esaki pa motibu ku e trabounan ta hopi i ta preferibel pa Derby konsentrá riba un área di trabou so. E eskoho ta trese kuné ku a nombra un direktor general suplente pa algun luna, den persona di Caroline Gonzalez-Manuel. Tambe a tuma e desishon pa start mesora ku e proseso di solisitut habrí pa un direktor general permanente.