22 partido ke bai elekshon fin di sèptèmber awor.


Te awor 22 partido polítiko a indiká ku nan lo mèldu djaluna awor 8 di ougùstùs pa entrega di lista pa elekshon di parlamento dia 30 sèptèmber próksimo. 20 di e 22 partidonan tabata presente durante un reunion di Konseho Supremo Elektororal, (KSE) pa kordiná e dia di inskripshon.

A invitá tur partido ku a indiká di ke partisipá na e elekshonnan binidero i personanan i/òf organisashonnan ku a pidi e dokumentonan nesesario serka KSE. Sigun presidente di Konseho Supremo Elektoral Raymond ‘Pacheco’ Römer entre tantu e kantidat a yega 22. E chèns ta eksistí ku esaki por bira mas, òf ku partidonan nobo ta disidí di tòg no bai elekshon mas paso nan no a logra paga e suma di 2000 florin ku segun lei partidonan nobo mester paga, pa por partisipá na elekshon. E reunion di informashon tabatin komo meta pa laga e entrega di lista kana lo mas efisiente posibel. A súplika e partidonan pa yena e dokumentonan i lista di kandidato mas korekto posibel. Tambe a pidi pa entrega tur dokumentu di forma digital, pa asina KSE kontrolá esakinan den dianan benidero. A informá esnan presente ku djaluna awor partidonan por entrega nan lista entre 9or di mainta pa 4or di atardi. Tur partido òf lista ta haña 20 minüt pa hasi esaki.E partidonan por a trèk lòt pa asina determiná e sekuensha den kuá lo entregá lista djaluna.