Ulanda no ta spera éksodo di venezolanonan pa nos islanan.


Gobièrnu ulandes no ta kere ku lo surgi un éksodo grandi di venezolanonan na e islanan parti di Reino Ulandes. Awor ku e situashon ta deteriorá gravemente na Venezuela tin un preokupashon pa motibu di e konsekuensianan di e gran desòrdu politiko i e malestar ekonómiko den e pais di suramerikano.

E Minister ulandes di Asuntunan Eksterior, Bert Koenders ta spera ku venezolanonan lo no bandoná nan kasnan pa bai biba den paisnan bisiña. Den un karta na “Tweede Kamer”, e titular a indiká ku no tin niun señal pa un posibel oumento di migrashon pa Kòrsou. E informashon aki el a risibí di Wardakosta.

Lo tin konsulta estrecho ku partidonan, manera por ehèmpel ministerionan di asuntunan interior i defensa di reino, embahada, e paisnan outónomo di karibe ulandes i e representante di reino na di Boneiru. “Aktualmente, no tin niun motibu pa introdusí un visa temporal karibense pa venezolanonan” asina e minister a deklará. Luná pasá (yüli) e alkalde di Chacao na Venezuela, Ramon Muchacho, a atvertí pa un éksodo venezolano na e islanan den karibe, Aruba, Boneiru i Kòrsou, pa motibu di skarsedat di kuminda i awa den e pais di latino-amérika