Digicel ta sostené e proyekto di Art Rules.


Den e siman tras di lomba a duna inisio na e serie di tayernan di Art Rules pa hóbennan for di 13 aña. Durante 2 siman lo enfoká riba arte, baile, teatro, músika, skibimentu kreativo i kon pa traha di pelíkula. E hóbennan lo risibí lès dor di instruktornan profeshonal den kada área spesífiko. Digicel ta kontentu di por a kontribuí na e proyekto, ku ta kuadra perfektamente den e kampaña ku nan a lansa resientemente ‘Bring The Beat’ ku enfoke riba músika, baile i e fushon ku deporte. “Den Art Rules Curaçao tin tur e ingredientenan akí i kombiná ku e entusiasmo di e hóbennan, Digicel ta sigur ku e próksimo 2 simannan lo ta eksitoso”, asina Sharvelo Felomina di departamentu di merkadeo di Digicel Kòrsou, a bisa.

E hóbennan a keda ‘stylish’ uniformá ku nan T-shirt di Digicel durante e ‘kick-off’ ku a tuma lugá na Kurá di Arte. 130 hóben lo partisipá aktivamente na e workshopnan. Digicel ta kontentu di por a regalá 6 hóben nan partisipashon na e lèsnan di Art Rules. Digicel ta spera ku e hóbennan lo disfrutá di nan partisipashon, pero mas ku tur kos pa nan sigui desaroyá nan talento. Arte ta vehíkulo di ekspreshon i un hóben ku sá kon pa ekspresá su mes lo tin hopi benefisio den bida despues.