Betty Wright ta remplasá Melody Gardot den Curaçao North Sea Jazz 2016


Lamentablemente Melody Gardot a kanselá su partisipashon na e di 7 edishon di Curaçao North Sea Jazz i den mésun rosea ta anunsiá un otro tremendo kantante ku lo remplasé. Djabièrnè 2 di sèptèmber Betty Wright lo ta riba stage Celia. Ku tres aña Betty Wright a kuminsá kanta den un grupo di gospel di famia. Ku 13 aña e la saka su promé disko i na edat di 14 aña su promé piesa a subi Top 40 ku e eksito “Girls Can’t Do What the Guys Can Do”. Ku 18 aña e la risibí su promé disko di oro i mientras tantu ya e ta tin un Mega Hit ku “Clean Up Woman” i e tabata reina di Miami Soul Sound. Mientras ku soul ta “in” den e milenio aki, Betty Wright ketu bai ta riba tour. Den 2011 e la saka su eksitoso disko “The Movie”, den koperashon ku e grupo hiphop The Roots. I awor, 40 aña despues di su disko di oro e “Clean Up Woman” ketu bai sin problema ta bari tur konkurensia for di stage. Dia 2 di sèptèmber e lo ta na Kòrsou pa su presentashon durante Curaçao North Sea Jazz.