Último tempu tabatin un retraso grandi den entrega di gas. Esaki ta debí na vários faktor èksterno, pero entretantu e situashon a mehorá. Un dje faktornan ta ku Curgas no tabata risibí suministro for di Refineria Isla. Otro faktor ta e kantidat haltu di silendernan defisiente. Ademas Curgas tabatin algun trùk dañá. Tur esakinan a kontribuí ku na dado momentu e kompania tabatin un retraso di kasi 10 mil silender pa entregá, asina direktor Yamil Lasten a splika prensa. Aktualmente a logra baha e retraso te na 3500 silender. Curgas a tuma algun medida adishonal pa sigui baha e kantidat te na 1500 silender, ku ta un situashon nòrmal. Den un anunsio, e kompania ta pidi klientenan pa sòru, pa number di kas ta visibel, kurá di kas mester ta asesibel i pa mara e kachónan riba dia di entrega. Esakinan ta kontribuí pa Curgas por duna mihó servisio na klientenan.