José Jardim ta disponibel pa sigui ku kartera di finansas pa PAIS.


Alex Rosaria (PAIS) a konfirmá pa korant Amigoe, ku e aktual minister di Finansas José Jardim ta dispuesto na kontinuá komo titular di e kartera. Jardim a keda nombrá komo Minister, durante entrada di Gabinete Betrian na 2012. El a sigui funshoná bou di Gabinete Hodge, Asjes i Whiteman. Tabata Parlamentario Independiente Glen Sulvaran, ku a presentá Jose Jardim komo su kandidato pa minister den e “Taken Kabinet”. Den e siman ku ta tras di lomba, ya tabatin indikashon ku parlamentario Sulvaran ta den kombersashon ku PAIS pa un posibel puesto riba lista pa próksimo elekshon. Lider di PAIS a splika ku nada no ta sigur, ya ku su partido tin un komishon outónomo ku ta atendé ku formashon di lista. Rosaria no por a duna aklarashon si e disposishon di Minister Jardim pa bolbe komo Minister pa PAIS, ta mará na kondishon pa Sulvaran subi lista di su partido. Den fin di siman e partido lo finalisá e rondanan di kombersashon ku posibel kandidatonan pa lista. Nòmbernan ku sí por spera riba lista di PAIS ta di Ministernan ku ya PAIS tabatin den gobernashon : Nelson Navarro, Etienne van der Horst i Stanley Palm.