Donald Trump ke pone merikanonan promé.


Ku Donald Trump komo Presidente di Merka, atenshon pa merikanonan lo ta na promé lugá atrobe i Merka lo dal un paso atras den su ròl mundial. Esaki tabata e liña kòrá den e spich di aseptashon dje kandidato Republikano. “Nos kredo lo ta merikanismo i no globalismo. Miéntras ku no tin polítiko ku ta pone Merka na promé lugá, otro paisnan lo no trata nos ku rèspèt. Esaki lo kambia den 2017”, asina Trump a bisa un arena bastante yen na Cleveland. Donald Trump a bisa na inisio di su spich, ku e lo no ta “politically correct”. Aparte di trese dilanti kon malu situashon ta na Merka, Trump a ataká su rival Hillary Clinton. “Na 2009 promé ku Clinton a kuminsá IS no tabata eksistí, Libia tabata traha ku nos i Egipto i Siria tabata bou di kòntròl. Despues di kuater aña IS ta tur kaminda den regio i mundu. Egipto i Irak ta den kaos”, segun Trump a kontinuá. E kandidato a papia mas ku un ora i a pone un rèkòrt nobo di e kandidato ku a papia mas largu durante aseptashon di su nominashon. Segun ku Trump tabata trese su spich, e kandidato Demókrata Bernie Sanders a komentá riba retnan sosial, indikando ku su siguidónan lo no vota pa Trump. E anochi a konkluí un siman tumultoso di e konvenshon Republikano, ku entre otro Meliana Trump ku a kopia spich di Michelle Obama i Ted Cruz ku no opstante di a papia durante e konvenshon a ninga di duna sosten na Trump. Otro siman ta e konvenshon di partido Demokrata ta start.