Minister Camelia-Römer ke desaroyá Marie Pampoen.


Hopi habitante di área Boca Simon a topa Minister Suzy Camelia-Römer i Domeinbeheer. Den kuadro di desaroyo di kosta den área, e titular a opta pa topa ku e hendenan di bario. Riba invitashon di Minister Camelia-Römer, Minister Larmonie-Cecilia tambe ta'tei presente pa duna informashon i skucha preokupashon dje habitantenan. Domeinbeheer den kolaborashon ku e kompania MIC N.V. a diseñá un plan di desaroyo ku lo tuma 5 luna pa ehekutá. Durante e enkuentro a presentá e plan akí na habitantenan i a skucha kiko nan ta opiná i deseá pa kambia.

E plan ta konsistí di entre otro: un área kaminda por kumpra algu di kome i bebe; un sitio kaminda mucha i adulto por praktiká arte; un koredor ku ta forma e base prinsipal di e infrastruktura, un espasio pa por hasi komèrsio, tualètnan públiko, un ‘outdoor gym’ i hopi mas. Den esaki a tene kuenta tambe ku aspekto di vegetashon i naturalesa. Pa habitantenan tabata importante pa tin un sitio pa hóbennan por praktiká arte i desaroyá kontinuamente nan abilidatnan artístiko. Tambe a bin dilanti ku tin nesesidat pa mas iluminashon i seguridat den e área. Algu ku ámbos partido tabata di akuerdo kuné, ta desaroyo di un koredor na kosta. Esaki tambe ta parti di e plan aktual i sigur lo yuda pa tin mas moveshon i asina mas seguridat den e área. Awor lo duna espasio na habitantenan mes pa indiká ken ta personanan responsabel ku lo por yuda manehá e área. Di e forma aki ke garantisá ehekushon di e plan i mantenshon di òrdu.