Awor ofisialmente Trump ta kandidato pa partido Republikano.


Ofisialmente Donald Trump ta e kandidato Republikano. Asina a keda ratifiká riba e di dos dia di e konvenshon Republikano ku ta tuma lugá e siman aki na Cleveland Ohio. Riba e promé dia, tabatin un movementu den e partido Republikano ku ta yama nan mes “Never Trump”, ku a purba na blòkia e nominashon di Trump. Sinembargo e grupo no a logra haña muchu sosten. Donald Trump, un empresario di 70 aña, a logra haña konfiansa di e 1237 delegadonan nesesario, pa ofisialmente bira kandidato pa e partido Republikano. Den un intento pa uni e partido, Trump a nombra Mike Pence komo su “running mate”, kandidato pa vise-presidente di Merka. Pence (57) ta un republikano konservativo, gobernador di Indiana. Mesora Trump a twit “Ta un honor pa por partisipá na elekshon den representashon di e partido Republikano. Lo mi traha duru i lo no defroudá boso. Merka promé!”. Di otro banda, Hillary Clinton tambe a usa retnan sosial pa reakshoná riba e nominashon ofsial. “Donald Trump a kaba di bira e kandidato Republikano. Uni bo mes, pa evitá ku nunka e lo pone pia den e kantor presidensial”, asina Clinton a skibi riba su Twitter. [if !supportLineBreakNewLine] [endif]