Meredith Mclver ku a skibi e spich di Melania Trump a pidi despensa i entregá su retiro. E spich di kasá dje kandidato Republikano Donald Trump, tabatin hopi paresido na e spich ku Michelle Obama a duna na 2008. Riba e promé anochi di e konvenshon Republikano na Cleveland, Melania Trump a presentá su spich, ku despues a bira komentario di dia riba retnan sosial. Media merikano a akusá e kasá di Trump di a kometé plagio. Mclver ku a skibi e spich, a bin ta hasi esaki pa hopi aña kaba pa Trump Organisation. “Miéntras mi tabata skibi e spich pa Melania, mi mente a pasa riba Michelle”, el a deklará. “Despues den kombersashon telefóniko ku Melania, ela splikami algun pasashi di Michelle, ku sin mal intenshon a resultá den su spich despues”. Meredith Mclver a sigui bisa, ku despues di tur e reakshonnan, mesora el a entregá su retiro na Donald Trump. Trump a ninga di aseptá su retiro, alegando ku “tur hende por kometé un fayo”. Melania Trump a bisa ku ta e mes a skibi su spich, ku menos ayudo posibel.
VIDEO : Komparashon entre spich di Melania Trump (2016) i Michelle Obama (2008)