Ministerio Públiko lo pidi Korte pa hasi rapòrt di wes Huub Willems públiko.(audio/links)


Asina reseso di korte terminá Ministerio Públiko lo hasi un petishon na Korte Komun pa hasi e rapòrt di profèser Huub Willems públiko. Riba petishon di Korte, e èks wes a hasi un investigashon riba malversashon ku a tuma lugá na kompanianan di gobièrnu, durante di e periodo di gobernashon di Gabinete Schotte. Segun Norman Serphos, bosero di Ministerio Públiko, Prokuradó General ta haña ku ta importante i di interes general pa hasi e rapòrt públiko. Na 2012 FAS (Fundashon Akshon Sivil) a entregá un petishon na Ministerio Públiko pa hasi un enkuesta sivil riba maneho diario di Aqualectra, Curoil i Refineria di Kòrsou. Ministerio Públiko na su turno a hasi un na petishon Korte. Korte a apuntá e èks wes Huub Willems pa hasi e enkuesta. Dia 8 di yüli último e èks wes a presentá resultado di loke el a konstatá. Liña kòrá den e rapòrt lo mester ta ku 220 mion a disparsé entre e periodo di 2010 pa 2012. Ta akusá Gerrit Schotte, komo Minister di Asuntunan General i komisarionan Oswald van der Dijs i Ray Treurnit.

Èks Promé Minister Gerrit Schotte a rechasá e akusashon ku durante su periodo di gobernashon a malversá miones na Aqualectra, ku komo resultado, e situashon pésimo ku e kompania ta aden aktualmente. “Realidat ta e maneho di e último 20 añanan ku te awe e kompania vital ta den un situashon finansiero pésimo pa motibu di maneho dudoso”, asina Schotte ta splika. Segun e Parlamentario, Aqualectra pa hopi aña kaba ta den problema finansiero, pero di maneranan astuto a logra skonde esaki pa pueblo. Den su komunikado Schotte a mustra riba vários kos ku a bai robes for di promé ku e periodo di 2010, entre otro loke rapòrt Vintage a konstatá na 2007, invershonnan di Aqualectra den BOO i diferente kasonan di iregularidat i mal maneho ku vários instansia a konstatá for di e tempu ayá. (klek riba foto pa lesa komunikado)

Billy Pandt ku tambe a forma parti di e gerensia di Aqualectra durante e periodo promé ku 2010, a splika ku e bèrdat lo sali na kla. Pa loke ta e akusashonnan den su kontra, Billy Pandt a bisa di lo no tuma pasonan hurídiko i laga e proseso kana su kurso. (klek riba foto pa skucha entrevista. Kortesia Notisia Direct)

Parlamentarionan Omayra Leeflang (UKH) i Alex Rosaria (PAIS) ya a indiká ku esnan responsabel lo mester paga e plaka bèk. Ambos mandatario ta pendiente pa tratamentu di e rapòrt den Parlamentu.