Riba òrdu di Fiskal di Ministerio Públiko (OM) a detené e bankero, èks direktor di Giro Bank, Eric Garcia awe mèrdia na Hato. Ta sospechá Garcia di malversashon di 10 mion dòler pa un kaso di fayesimènt di e kompania di aviashon DAE, den kual ela fungi komo kuratòr. Probablemente Garcia lo a falsifiká dokumentunan. Asina e informe ofisial di Ministerio Públiko ta bisa. Aparte di e detenshon di Garcia, a tene redada tambe na dos lokalidat. A drenta den kas di Garcia i su ofisina na Groot Davelaar. Aki tambe a bai ku vários dokumento. E detenshon di Eric Garcia na aeropuerto internashonal di Kòrsou i redadanan (inval), a tuma lugá dor di funshonarionan di reshèrshi i Samenwerkings Team (RST). Garcia ta detené i djabièrnè awor lo presentá e sospechoso dilanti wes komisario. E investigashon ta kontinuá.