Raad van Advies (RvA) ainda mester aprobá e areglonan pa ehekushon di e proposishon di lei 80/20. E lei ta proponé ku 80% di pèrsonanan ku ta traha den un kompania mester ta di orígen lokal. Despues gobernador lo mester firma pa seguidamente publiká e lei. Esaki ta loke minister di Desaroyo Sosial, Labor i Bienestar , Ruthmila Larmonie-Cecilia (PS) ta splika. Segun minister Larmonie-Cicilia, tin 3 areglo di ehekushon ku ta splika e lei original. Artíkulo 2 di e lei, ta splika distinshon entre trahadónan lokal i esnan ku no ta ser konsiderá komo lokal. Ademas e ta indiká kon pa enbolbí pèrsonanan ku limitashon den e merkado laboral i otorgashon di “ontheffing” pa e lei.
Ya e lei di 80/20 a pasa 2 diferente trayekto, esta esun di e lei original i esun di e areglonan di ehekushon. “Mi a entregá e areglonan di ehekushon na RvA siman pasá. M’a pidi tambe pa atendé esaki ku urgensia”, segun Minister Larmonie-Cecilia.
Pueblo Soberano ta kere den e lei 80/20 pasó e partido ta boga pa mas trahadó lokal haña trabou. Den un nota di 2012 RvA (Raad van Advies) a indiká ku e lei akí lo ta un infrakshon riba e prinsipio di igualdat (gelijkheidsbeginsel), paso lo hasi un distinshon den trahadónan a base di nan nashonalidat. E minister a indiká ku tin un rason legítimo pa hasi esaki, esta na benefisio di ekonomia di Kòrsou.