A kuminsá ku identifikashon di e víktimanan dje atentado siman pasá na e siudat di Nice na Fransia. Di e 84 mortonan, 10 tabata mucha i adolesente. Entre e pèrsonanan ku a identifiká kaba tin hopi pèrsona di nashonalidat franses. A identifiká tambe entre e víktimanan 1 pèrsona di nashonalidat ruso, 2 estadounidense, 3 aleman, 2 armenio, 1 ukraino i 1 suiso. Nan tur a pèrdè nan bida na momento ku un pèrsona sospechá di ta terorista a kore drenta un multitut di hende ku su trùk na e siudat Nice dia 14 di yüli último, dia di Bastille, ku ta un dia di selebrashon nashonal na Fransia. 303 pèrsona a keda heridá, entre nan 54 mucha. Presidente di Fransia, Francois Hollande a bisa ku e atake akí probablemente ta unu terorista. E víktimanan ta varia entre hendenan di vários parti di mundu. Tin ainda algun pèrsona ku outoridatnan no a logra identifika.
Ketu bai hopi hende ta pone bela na memoria di e 84 pèrsonanan ku a pèrdè nan bida na Nice, Fransia.