Segun bosero di Fundashon Bon Intenshon, djabièrnè pasá dia promé di yüli un funshonario a yam’é pa pidi nan kambia orario di e aktividat planiá djasabra mainta na Sentro di Bario Montaña. Riba e mainta ei, dia di Himno i Bandera, e fundashon a duna oportunidat na 5000 hende pa hasi un kontribushon di 5 florin na e Sentro di Bario i risibí un karchi grátis pa apertura di Curaçao North Sea Jazz 2016 ku Juan Luis Guerra i Kassav. Pinedo a splika nan ku ya a hasi tur preparashon i ku lo no por kambia e orario, pero lo konsiderá esaki pa hasi e kambio otro aña si. Sinembargo tòg Promé Minister Ben Whiteman tabatin krítika riba e fundashon durante su diskurso riba Plasa Brion, pues FBI a disidí ku esaki ta e último konsierto gratis relashoná ku CNSJ.